Martxoaren 6an -asteartea- arratsaldeko 19:00etan Jai Batzordearen bilera izango da. Kultur etxean elkartuko gara, eta bileraren helburua pasa berri diren inauteriaren balantzea egitea.

 Aurtengo karroza eta konpartsen lehiaketako sari banaketa atzo arratsaldeko 18:30ean egingo zen udaletxeko batzar aretoan. Epaimahaiak hala erabakita, aurtengo txapelak jaso dituzten taldeak honakoak izan dira:

· Karrozen sailean, Egipziarrak

· Konpartsen A taldean (25 taldekidetik gorako konpartsetan), Argazki bilduma

· Konpartsen B taldean (25 eta 13 taldekide arteko konpartsetan), Burbujitas

· Konpartsen C taldean (12 eta 6 taldekide arteko konpartsetan), Milenioko ezkontza

· Konpartsen D taldean (6 taldekidetik beherako konpartsetan), Live Elton John

Aurtengo epaimahaikideak Jai Batzordeko lehendakari Edurne Mendia, Jokin Monfort koordinatzailea eta iazko lehiaketako irabazleak izan dira: Haritz Doyhartzabal, Roberto Díez, Josune Alonso, Jone Azaldegi eta Juan Cruz Ortega.

Piñata igandea, Inauteriei amaiera emateko

Bihar, otsailaren 26an, Poca Tripa eta Txilaba elkartearen konpartsa Iurreamendi egoitzara joango dira aurtengo Inauteriei amaiera emateko.

Joan dira aurtengo Inauteriak eta tolosar askok datorren urtekoetarako jada gutxiago falta dela pentsatuz kontsolatu dugu gure burua, ez baita erraza gero berriro egunerokora bueltatzea. 2013ko otsailaren 7a da buruan dugun eguna, Ostegun Gizena. Hara heldu aurretik, ordea, aurtengoak ondo bukatuta utzi behar ditugu.

Beste ezer esan aurretik, udalak bereziki eskertu nahi dizue jaiari aurtengoan ere egin diozuen ekarpena. Pasa berri ditugun Inauterietan jai-giroa eta umorea izan dira errege, eta hein handi batean, karrozak eta konpartsak izan dira horren sekretua. Jator jardun duzue herriko kaleak alaitzen eta orain, datorren urtera arteko lanak behar bezala bukatuta uzteko, eraikitako karrozak eta konpartsak eta horretarako erabilitako lekuak txukun jasota uztea bakarrik falta zaigu.

Pasatu dira Inauteriak eta Tolosako Udalak azken sei egun hauen balorazio positiboa egiten du. Lehen balorazioa da eta datu eta informazio zehatz guztiak oraindik eskura ez dauden arren, Inauterietan jai-giroa, umorea eta festa bermatuta egon dira Tolosan, herritarrentzat zein kanpotik etorri diren guztientzat. Jendeak ondo erantzun du eta udalak eskertu egin nahi du hori, Inauteriak jai herrikoiak baitira eta hala izan behar baitute.